الا بجد بجد يعني
موضوع الاضراب ده كان كدبة ابريل ولا ايه؟
والله صدق اللي قال ان "ناس تخاف ما تختشيش"
مع ان الناس معاها حق تقريبا اننا نخاف على نفسنا من الاعتقالات والهزار اللي ممكن يحصل من اي عسكري معدي بس ، الكلام والتخويف واضح وصريح للناس - بس اللي وصلني ان الناس احتاروا يعملوا ايه ؟ ميرحش الشغل وفي الاخر يتجازى او يتخصم منه ولا يعتقل في سكة اي مظاهرة معدية ؟ هي ناقصة العيال تتشرد يعني ؟
اللي ضحكني اوي اوي بجد غير ان الناس عادي مقضية يومها عادي اوي ورايحة الشغل طبيعي- واللي يقدر مايروحش الشغل مارحش عشان خايف على نفسه تقريبا مش عشان الاضراب ولا حاجة- اللي ضحكني انهم قالوا ان الاخوان والوفد وكل الاحزاب السياسية والذي منه مشتركين
لكن فوجئت ان فيه خبر في الجزيرة بيقول ان الاخوان بيباركوا الاضراب لكنهم مش مشتركين فيه اصلا وكذلك الوفد
تفاصيل الخبر في الجزيرةوالعادي طبعا ان حتى ان تقريبا فكرة الاضراب اضربت زي ماحنا شايفين
يعني الاخوان مش مشتركين واللي حيحصل عبارة عن نشاط وانتشار زائد عن حده للامن - اللي غالبا مش حيلاقوا ناس كتير اوي غير اللي اتعودوا يلاقوهم في كل المظاهرات تقريبا
وقالوها واضحة ان الاضراب حيفشل وهنا حتلاقي الاسباب المنطقية لذلكالفكرة بقى اللي مش فاهمة ليه الناس مفكروش فيها اننا نعمل اضراب عن الشراء الا عن الدواء طبعا كسلعة اجبارية - كانت الناس عادي تروح اشغالها ودراستها لكن محدش يشتري يشتروا الاكل اليوم اللي بعده اللي قبله براحتهم لان ببساطة مكنش حد يقدر يجبرهم واو يمنعهم او يعاقبهم انهم ميشتروش هي دي كانت القوة بجد لكن تقول ايه
كالعادة الناس متفرقة وخايفة ومناظر العساكر والظباط والامن المركزي تخوف كل الناس كاننا في حالة حرب ضد نفسنا
والله الرعب ده حيودينا لحد فين
ما تخلوا الناس تعبر عن رايها براحتها حتى عشان يتقال عننا في المجتمع الدولي اننا بلد ديموقراطية بس و الله مش عشان اي حاجة تانية - علمونا بس الطريقة الحلوة الهادية اللي متضرش حد - لكن على مين هو اصلا كان فيه بيعلم حد دلوقتي ؟
المشكلة التانية والاساسية -غير الرعب من الاعتقال- في ان الناس مبقاش عندها امل ان لو عملوا اضراب و حتتحقق مطالبهم - ايه اللي يعرفهم او يضمنهم انهم لو ما اشتغلوش يومها حيتغير حاجة كل اللي حياخدوه انهم يتجازوا يتخصم منهم
انا لست ضد الاضراب اطلاقا انا بس صعبان عليا الروح المعنوية اللي حتنزل في الحضيض لو المطالب اللي هي غير واضحة اوي لم تتحقق وده اغلب الظن ماسوف يحدث،
هو فيه حاجة بعد ماغلاها تاجر حترخص تاني؟ حيكسب ايه؟
هي بداية معقولة ان حد يفكر في حاجة يعبر بيها عن راي الناس المطحونة
بس كل اللي حناخده ونعرفه ان الشرطة في خدمة الشرطة والحكومة والمواطن المتنوم مغناطيسيا
ولحكاية التنويم المغناطيسي ده حكاية تانية
حابقى احكيها في حلقة قادمة قريبة ان شاء الله - المهم اني بس كنت بحاول اكون في وسط الحدث محاولة مش اكتر
انا هنا لا اكتب الا رايي اللي بحاول على الاقل انه يتسجل عشان مبقاش بكتم نفسي انا كمان
ولست ضد الاضراب نفسه او فكرته لكن ضد طريقته فقط
واتمنى بعد حبة سنين كده اني الاقي الحال بيتغير و نتعلم ننظم حاجة صح بقى
على راي عمرو اديب: المصري بيحب الحكومة وليس لديه فكرة الاضراب الشيك
سؤال عابر بس (لا غرض له الا السؤال) : مين بظبط اللي شيك - وهل هي شياكة لبس ولا ذوق ولا ايه بظبط؟
ولحد دلوقتي الخوف من ان الناس تنتهز فرص للتخريب والتدمير زي ماتوقعوا اغلب الناس- لم يتحقق منه شئ بل تحققت نبوءة الشعب انه حيصبح كتير منه بكره الصبح في المعتقل او قسم الشرطة على اقل فرض وذلك للي حاول يتكلم ويشترك في المظاهرات اللي بتبقى سلمية تماما الى ان يتدخل الامن
احتمال يكون في تتابع لهذه التدوينة على حسب احداث بعد الساعة الرابعة عصرا
